GeForce GTX 480 и GeForce GTX 470 ќе бидат имињата на првите две графички картички кои ќе се базираат на новиот GF100 графички чип.

Во моментов има премалку информации, така да нема многу што да се коментира, освен околу имињата кои да признаеме се мало изненадување. На прв поглед имињата се во согласност на G / GT / GTX шемата на именување на Nvidia, но што се случи со броевите? Технички кажано, Nvidia ја исфрли својата 300 серија кон крајот на минатата година со GeForce 310, која всушност е OEM препакувана GeForce 210, после што сите очекувавме Nvidia да го пополни остатокот од 300 серијата со GF100 чипови и неговите деривати, слично како што е организирана 200 серијата со микс од DX10 и DX10.1 производи. Овие очекувања се однесуваат на GTX 380 и GTX 360, кои веројатно нема да ги видиме.

Подетални информации за двете картички се уште нема, се уште не се знае какви перформанси ќе понудат, ниту пак со кои брзини ќе располага графичкото јадро и меморијата, како и бројот на CUDA јадра. Едно е сигурно, на денот кога ќе бидат исфрлени, GeForce GTX 480 ќе биде на врвот, а GeForce GTX 470 ќе бида послаба со неколку оневозможени CUDA јадра. Потоа веројатно ќе следуваат моделите од средна класа, кои препоставуваме ќе го задржат шаблонот на именување, за да на крајот се појават и буџет графичките картички од најниската класа. Бидејќи не се знае дали GeForce GTX 480 ќе ја сочинуваат еден или два графички процесори и понатаму може само да погодуваме дали ќе се појави GeForce GTX 490, која можно е да биде двоглава ламја.

Официјалното претставување на 400 серијата се уште не е познато, а за датумот на појавување престанаа да зборат дури и партнерите на Nvidia. Сите, па и ние се надеваме дека ќе бидат достапни после Cebit.